Fwa Smash的部落格

1. 利是金額勿出現單數

喜慶節日當然要「好事成雙」，一對或雙數等東西都比較吉利，而且喺喪禮上封嘅吉儀係單數，如果利是係單數嘅話就會被人感覺你咒罵佢過身，所以記得要包雙數金額啊！同時，如果係已婚夫婦派畀親友都係派兩封，新婚夫婦第一次派利是都要各派兩封，以取「雙雙對對」嘅意頭。

但係如果派畀公司同事，而對方係唔識得你另一半，你可以選擇派單封，離婚人士都可以各自派單封。

2. 避免使用過期利是封

利是除咗係一種祝福外，亦都象徵好意頭。例如下年係豬年，假如利是封用咗印有今年生肖嘅狗仔圖案，可能會畀人一種小氣、窮酸感覺。如果唔想利是封「過期」，大家可以選擇使用一啲無印上生肖嘅利是封。

亦有人話唔好用已經用過嘅利是封再封利是畀人，因為好運已經被開過，再開就無了，不過而家我哋講求環保，相信大家都唔會介意嘅。

3. 新年巧遇白事勿派利是

一旦不幸喺農曆年期間撞正屋企有白事，就唔好去人哋屋企拜年同埋派利是喇，有指會將衰氣帶畀對方。不過人哋去你屋企拜年就無問題，而且你都可以收利是，寓意收啲好運返嚟！不過每個地方嘅習俗都唔同，有人會選擇唔派又唔收。

4. 揀利是封都有學問

中國人有好多禁忌，對於農曆新年就覺得一定要大紫大紅，所以利是封都避免用藍色、綠色、白色等象徵白事嘅顏色，一旦收利是一方係比較傳統嘅人，都幾難收科！

5. 親友帶禮物拜年應要回利是

新年期間大家都會帶埋賀禮互相拜年，身為主人家嘅一方接過禮物後應該要回返封利是畀對方，寓意有來有往，金額通常係$20或者$50，視乎個人而定。

6. 派利是都有時限

傳統認為正月初一至正月十五都係過新年，所以一般都會派到正月十五。而拆利是就要正月十六後先可以拆，寓意收集晒所有祝福後先一次過打開。